بجرنگ دل کے بعد درگا واہنی نے دی اب خواتین کو ہتھیار چلانے کی ٹریننگ

دہلی، ۳۰؍مئی: (ایجنسی) ایودھیا اور نوئیڈا میں بجرنگ دل کی طرف سے منعقد شوریہ کیمپ میں سیلف ڈیفنس کی ٹریننگ کا تنازعہ ابھی ٹھنڈا بھی نہیں پڑا تھا کہ وارانسی کے سگرا واقع اسکول میں وشو ہندو پریشد کی خاتون ونگ نے لڑکیوں اور خواتین کو ہتھیاروں کی ٹریننگ دے کر ایک نیا تنازعہ کھڑا کر دیا ہے۔ وی ایچ پی کی خاتون یونٹ درگا واہنی کے ذریعہ وارانسی کے سگرا واقع اسکول میں لڑکیوں اور عورتوں کو ہتھیار چلانے کی تربیت دینے کے لئے ایک کیمپ لگانے کا معاملہ سامنے آیا ہے۔وارانسی میں وشو ہندو پریشد کی خاتون ونگ درگا واہنی نے بھارتی پبلک اسکول میں سیلف ڈیفنس کیمپ کا انعقاد کیا۔ اس کیمپ میں خواتین ہتھیاروں کے ساتھ ٹریننگ کرتی دکھائی دے رہی ہیں۔ ان کے ہاتھ میں بندوق یا رائفل جیسا ہتھیار ہے۔ کیمپ میں



خواتین اور لڑکیوں کے ساتھ بچیاں بھی ٹریننگ لیتی نظر آ رہی ہیں۔ سبھی کو ہتھیار چلانا سکھایا جا رہا ہے۔تاہم درگا واہنی کے مطابق یہ رائفل نہیں بلکہ ایرگن تھی۔ اس کے علاوہ لاٹھی ڈنڈے اور جوڈو کی بھی ٹریننگ دی گئی۔ اطلاع ملنے پر پولیس نے اسکول میں تحقیقات کی تو اسے کوئی ہتھیار نہیں ملا۔ لیکن تصاویر میں صاف ہے کہ انہیں ہتھیار چلانے کی تربیت دی گئی۔وارانسی کے آئی جی ایس کے بھگت نے کہا کہ کیمپ میں کوئی بھی قابل اعتراض ہتھیار نہیں ملے۔ یہاں تک کہ ایرگن یا لاٹھی بھی نہیں تھی۔ خواتین کو صرف جوڈو کی تربیت دی گئی۔ لیکن تصاویر پولیس کے دعووں سے مختلف ہیں۔بتا دیں، کچھ دنوں پہلے ایودھیا میں بجرنگ دل نے شوریہ کیمپ منعقد کر ہتھیاروں کی ٹریننگ دی تھی جس کے بعد ضلع کنوینر مہیش مشرا کو گرفتار کر لیا گیا تھا۔